CEBU, Philippines - Gibarugan sa Kapitolyo ang pagpadaug sa labing mahal nga presyo sa heavy equipment balor og P250 milyones gikan sa ConEquip Philippines.
Kini bisan og ang duha ka supplier mas minus og P15 milyones sa presyo samtang naila na sa lig-ong kalidad sa ekipo ang ila’ng gitanyag.
Giingong ang duha wala makatuman sa mga rekisitos hinungdan nga wala kini gipadaug sa bidding.
Ang ConEquip napakyas sa una’ng hugna sa bidding apan girekonsiderar sa Bids and Awards Committee nga gipangulohan ni Atty. Mark Tolentono.
Ang RDAK nitanyag og labing ubos nga presyo nga P235 milyones samtang ang Civic Merchandising Inc.-Volvo Construction Equipment P237 milyones.
Sa giisyu nga report kagahapon sa Provincial Information Office (PIO), kini nagkanayon nga ang winning bidder o “highest bidder” maoy nakakuha sa kontrata tungod kay mao kini ang adunay lowest calculated responsive bid (LCRB).
Subay niini, si Gobernador Hilario Davide III nisuporta sa desisyon sa BAC ug nisalig sa mga tawo nga gitahasan niini.
Ang mga dokumento sa BAC anaa pa sa hunta probinsiyal alang sa pag-review sa dili pa mohatag og pagtugot sa pag-award sa kontrata. (BANAT NEWS)