CEBU, Philippines - Usa ang patay ug lima ang naangol human nasaghiran sa motorsiklo ang laing motor nga niresulta sa ila’ng pagkalukapa sa karsada sa Barangay Pondol, Lungsod sa Balamban pasado alas 7 sa nakalabay nga gabii.
Ang namatay giila nga si Remy Sigue, hingkod nga taga Pili, Balamban, backrider sa XRM nga motor, samtang grabe’ng naangol usab ang drayber nga si Gilbert Maglasang, 19, kinsa nakaangkon usab og mga bun-og sa lawas ang laing backrider nga si Jay Vincent Padigos, 13.
Samtang ang drayber sa nakasaghid nga RUSI nga motor nga si Elmer Canape, 36, kauban ang duha ka backrider nga sila si Kim Padilla, 20, ug Justin Abatayo, hingkod, ang nakaangkon usab og mga pangos ug bun-og sa kalawasan.
Matud ni Police Officer 1 Alexander Camoro sa Balamban Police Station, nga subay sa managlahi’ng direksyon ang duha ka motor apan pag-abot sa nahitaboan ni-overtake sa laing sakyanan si Canape ug didto nisaghid sa kasugat nga motor.
Nawad-an og balanse si Maglasang ug didto napasok sa kanal kilid sa karsada samtang nalukapa usab sa dalan ang motor ni Canape.
Grabe’ng bun-og sa ulo ang naangkon ni Sigue kinsa gidala pa unta sa Balamban District Hospital apan nakabsan gyud sa kinabuhi.
Kasamtangan nga gitanggong sa selda sa kapolisan si Canape apan si Camoro nipasabot nga lagmit ila ra usab nga mabuhian ang drayber kung wala’y kaso nga ipasaka batok niini.
Lola patay
Sa Balamban gihapon, patay ang usa ka lola nga nadasmagan og motor sa Barangay Buanoy.
Giila ang biktima nga si Teodorica Vego, 63, nagpuyo sa nahisgutang lugar, samtang ang drayber sa motor mao si Raymond Rosenio, 26, taga Siyudad sa Toledo.
Paingon sa norte si Rosenio diha’ng kalit nga nilabang sa karsada ang biktima hinungdan nga nadasmagan ug nalagpot.
Maayong pagkalamba sa biktima sa sementado’ng dalan ug naigo ang ulo niini ug dali’ng gidala sa tambalanan diin gideklarar nga patay na.
Nagdasmagay angol
Samtang angol ang duha ka motorista human nagkabangga ang gimaneho’ng motorsiklo sa dalan S. Osmeña eskina Climaco extension, Poblacion, Dakbayan sa Toledo.
Ang mga naangol mao sila si Lorenzo Generale, 31, ulitawo nga taga Lamisa, Balamban ug Arne Caño, ulitawo, taga Carmen, Toledo.
Si Generale gikan sa Balamban ug pag-abot sa nahisgutang lugar wala nakabantay si Caño nga mao’y paggawas gikan sa laing linya sa dalan hinungdan nga nagkadasmag ang duha ka motor ug nangalukapa.
Gidala ang mga biktima sa Toledo City Hospital gumikan sa naangkon nga mga samad ug bun-og sa kalawasan.
Cebeco II
Naangol ang napulo ka tawo diha’ng ang sakyanan sa Cebu Electric Cooperative (Cebeco II) sa Dakbayan sa Toledo ang nabangga sa gikasugat nga multicab sa Lamac, Barangay Don Gregorio Antigua, Lungsod sa Borbon alas 5 pasado sa buntag sa niagi’ng adlaw.
Si Senior Police Officer 3 Owen Baticuang sa Borbon Police Station niingon nga ang service sa Cebeco II nga nagdala sa plate number YME 356 ang gimaneho ni Gabriel Logronio Vitor, Jr., 41-anyos, minyo nga taga Malingin, Dakbayan sa Bogo.
Nagdagan ang sakyanan padulong sa amihanan diha’ng ang gikasugat nga multicab nga nagdala sa plate number JFF 380 nga gimaneho ni Noel Cao, 29-anyos nga taga Angeles City, Pampanga, kalit lang nikawat sa pagsubay sa pikas lane tungod sa nag-parking nga laing sakyanan hinungdan sa pagkasungag sa sakyanan sa Cebeco II.
Matud ni Baticuang nga tungod sa kusog nga impact, nakasinati ang duha ka sakyanan og grabe’ng kadaut nga niangol usab sa isigka-drayber.
Dugang nangaangol mao ang mga nagsakay sa sakyanan sa Cebeco II nga sila si Jovelyn Mahilom, 46; John Sumayang, Kerwin Batiancila, Simeon Luregas, Glenn Albano, Jojada Sumayang, Alleya Sumayang ug Lowell Batiancila, pulos taga Dakbayan sa Bogo.
Si Baticuang niingon nga dali hinuon nga gidala sa provincial hospital sa Dakbayan sa Bogo ang mga biktima. (BANAT NEWS)