CEBU, Philippines - Gisugdan na sa City Environment and Natural Resources Office ang composting sa mga basura nga malata gikan sa Carbon Public Market sa South Road Properties sukad sa niagi’ng semana.
Matud sa pangulo sa CENRO, Arleigh Gesta, nga anaa na sa 20 ka tonelada ang nalabay sa bakante nga luna nga nahimutang duol sa Pound A sa SRP.
Dugang ni Gesta nga ang composting site gihimo aron pagpaminus sa problema sa basura.
Gipasabot ni Gesta nga adunay gibutang nga laing hugaw nga mo-absorb sa mga manggawas nga duga gikan sa basura nga maoy gikahadlokan sa tawo nga maadto sa dagat. Si Gesta nipasabot nga dili kini angayan kabalak-an.
Adunay gidak-on nga usa ka ektarya ang composting site diin ang Barangay Ermita pa lang ang naglabay tungod kay mao’y adunay labing daghan nga malata nga basura nga malabay gikan sa Carbon Public Market. Kasamtangang adunay composting site ang Dakbayan sa Sugbo nga nahimutang sa Barangay Kalunasan ug laing mga bukirang barangay sa dakbayan. (BANAT NEWS)