16-anyos nangita’g piso sa pati nakuryentihan
CEBU, Philippines - Patay na nga nakit-an sa iyang ginikanan ang usa ka 16 anyos nga lalaki ibabaw sa kisame sa usa sa mga abandonadong building sud sa compound sa Department of Public Works and Highways (DPWH) sa Barangay Lilo-an sa Lungsod sa Santander sa nakalabay nga buntag.
Ang biktima naila nga si Francis Jay Bureros, nagtungha sa high school ug nagpuyo sa maong dapit.
Si Police Officer 2 Franklin Digao, nga nahinabi sa Banat News niadtong Sabado sa gabii nakit-ang sa iyang mga amigo nga misulod kini sa lugar kay nangita og piso ug itlog sa pati.
Apan nagbuntag na lang wala nakauli hinungdan nga gipangita kini pagkabuntag sa iyang ginikanan hangtud nga natultolan kini diha sa kisame nga wala nay kinabuhi ug naputos og paso iyang paa. Nagduda si Digao nga nakasaghid og “live wire” ang biktima samtang kini nagkamangkamang sa kisame hinungdan nga namatay.
Si Digao miingon nga makadaghan nang higayon nga mosulod sa maong compound ang biktima pagpangita og pati nga iyang buhion.
Nasayran usab sa kapulisan gikan sa inahan ni Bureros nga mahilig lang gayod og pati ang biktima nga iyang gusto nga buhion.
Gitambagan sa kapulisan ang pamilya nga ipaotopsiya ang lawas sa batan-on apan nagdumili ang inahan kay kombinsido na kini nga aksidente ang nahitabo sa iyang anak. (BANAT NEWS)
- Latest
