CEBU, Philippines - Gitulis sa pasahero ang drayber sa taxi gamit ang buwang sa igtatari nga manok sa Barangay Tanke, Dakbayan sa Talisay niadto’ng Domingo sa gabii. Ang biktima nailhan nga si Rogello Veloso, 42, minyo nga taga Bombel, Pulpogan I, Consolacion.
Si SPO1 Mikie Espina sa Talisay City Police Station nagkanayon nga ang biktima namasahero ug gipara sa usa ka lalaki nga magpahatud sa Dakbayan sa Talisay.
Pag-abot sa Barangay Tanke, nibunot sa iya’ng bag ang suspek dayon tion sa buwang sa manok ngadto sa ubol-ubol sa biktima ug nideklarar og tulis dayon sulti nga "kwarta lang ako".
Tungod sa kahadlok sa biktima, niambak kini sa taxi ug gibiyaan ang iya’ng unit samtang ang suspek tungod sa kahadlok nga mabulabog, gipadagan ang taxi dayon sibat sa lugar.
Si Veloso ang nidangop sa kapolisan aron matabangan.
Si PO2 Junyl Ater, desk officer sa TCPS, niingon nga nakadawat siya og tawag gikan ni Kapitan Perla Cabanes sa Barangay Tanke ug nagpahibawo nga aduna silay nakit-an nga taxi nga gibiyaan lang sa Sitio Kilawan.
Ang taxi adunay plaka nga GXC-463 ug adunay pangan nga Joysellemar.
Matud ni Ater nga aduna’y nadala ang suspek apan sinsiyo lang. Gi-claim ang taxi ni Vincent Chan nga mao’y gihatagan og katungod sa operator nga si Marlon Chan. Sigun pa ni Ater nga posible’ng sugarol ang suspek ug kini napilde sa buwang ug wala’y laing kapahimungtan aron mabawi ang pilde mao’ng nanulis og drayber sa taxi.
Dugang ni Ater nga naglisud ang biktima sa pag-ila sa suspek tungod kay nagkawo kini. (BANAT NEWS)