Babaye nangayo og pasaylo sa 3 ka polis

CEBU, Philippines - Nangayo na og pasaylo ang babaye nga niangkon nga mao’y nag-post sa Facebook nga nag-viral kabahin sa tulo ka polis nga gipasanginlang wala nibayad sa gikaon nga siomai sa dalan Colon, Dakbayan sa Sugbo sa niagi’ng buwan.

Kini uban na usab sa paghangyo nga dili na lang ipadayon ang kaso nga napasaka na nila ni Police Officer 2 Lolito Bustria, PO1 Policarpo Barliso Jr. ug PO1 Jonathan Cabañero batok sa 23-anyos nga babaye.

Hinuon, ang babaye nga giingong  na “trauma” sa mga panghitabo, wala niatubang sa mga tigbalita ug ang inahan ang niatubang sa media alang sa public apology.

“Mao nay pagaingnon nga ang tawo masayop ra gyud, di man gyud ta ingon nga perpekto. Nangayo gyud mi og pasaylo gyud nila. Pasayloon na lang unta nila ako’ng anak kay unsaon man nga nahitabo na man, bisan unsaon pa pagbalik, nahuman na man,” matud sa inahan.

Matud sa inahan nga ila’ng nakita sa telebisyon sa pagbuto gyud sa balita apan wala sila magdahum nga ang ila na diay kadto’ng anak ang nag-post sa Facebook niadto’ng Nobiyembre 12 tungod kay wala man usab hinganli ang babaye.

Usa ka semana pa ang nilabay una sila kahibawo sa ila’ng silingan sa gidangatan sa ila’ng anak.

Sigun niya nga dugay-dugay gyud sila nakapakita sa opisina sa Waterfront Police Station diin na-assign ang tulo tungod kay nahadlok usab sila sa reaksyon sa kapolisan kung mopakita sila. Matud sa inahan nga iya gyud gipahimangnoan ang iya’ng anak nga magpaka-responsable kung unsa ang i-post sa Facebook aron wala’y laing tawo nga masakitan.

Kahinumduman nga nipakita na usab ang siomai vendor sa Waterfront Police Station ug nihimakak sa nabutang sa post sa babaye ug niingon nga nibayad gyud ang kapolisan. Samtang nagpasalamat ang tulo ka polis apil na usab ang hepe sa Waterfront Police Station nga si Chief Inspector Jose Gesto sa gibuhat sa babaye nga nangayo og pasaylo tungod kay matud pa usa kini sa paglimpyo dili lang sa ila’ng pangan ug lakip na usab sa tibuok organisasyon sa Philippine National Police.

Apan matud ni Bustria nga sa pagkakaron, ila lang usa ipatubag sa babaye ang kaso nga gipasaka ngadto sa korte ug ila pa’ng sabutan ang mahitungod sa pag-areglo sa kaso. (BANAT NEWS)