CEBU, Philippines - Gipasidungan sa Police Regional Office (PRO-7) ang Cebu City Anti-Drug Abuse Council (CADAC) isip Most Outstanding City Abuse Council sa tibuok Central Visayas.
Matud sa chairman sa CADAC Atty. Paul Clarence Oaminal nga ang pasidungog timailhan sa aktibo nga pagpangampanya batok sa gidili nga drugas. Dugang pa ni Oaminal nga ang maong pasidungog maoy unang higayon nga nakadawat ang dakbayan sa Sugbo og susamang pag-ila sa ilang nahimo batok sa ilegal nga drugas.
Si Oaminal miingon maisip niya nga malampuson ang CADAC sa mandato niini nga mao ang pagbuntog sa problema sa drugas.
Karong umaabot nga Disyembre 7 pasidunggan usab sa CADAC ug City Office of Substance Abuse Prevention (COSAP) ang kabarangayan nga naghimo sa ilang trabaho ug pagkampanya batok sa illegal nga drugas sa tagsa-tagsa nila ka mga barangay.
Lakip sa pasidunggan nianang adlawa ang mga tinun-ang nakadaog sa kompetisyon nga gipasiugdahan gihapon sa maong buhatan may kalabotan gihapon sa kampanya kontra ilegal nga drugas. (BANAT NEWS)