Tungod sa problema, anak gidunggab sa papa

CEBU, Philippines – Grabe’ng naangol ang anak nga biktima sa pagpanunggab sa iya’ng kaugalingong amahan sa Barangay Sabang, Dakbayan sa Danao alas 11 pasado ang takna sa niagi’ng gabii. Si Police Officer 3 Arnold Labine sa Danao City Police Station niila sa biktima nga si Isidro Donaire, 50-anyos ug ang suspek nga amahan mao si Ladislao Donaire, 74-anyos.

Si Labine niingon suliran sa ila’ng pamilya ang hinungdan sa mainiton nga panaglalis sa amahan ug anak nga nisangko sa dugoong panghitabo gamit ang kutsilyo ug gidunggab ang biktima sa ulo. Dali nga gidala ang biktima sa Danao Provincial Hospital ug gibalhin sa Vicente Sotto Memorial Medical Center.

Samtang alas 9 pasado sa niagi’ng gabii sa Sitio Bayabas, Dakbayan sa Danao, grabe usab nga naangol ang biktima sa pagpamusil. Si Labine niila sa napusilan nga si Ricardo Quiniquinto, 54-anyos. Dugang ni Labine nga nagtuman lang sa sugo sa lawas ang biktima luyo sa ila’ng panimalay diha’ng wala hiilhi’ng lalaki ang kalit lang nitumaw ug gipusil ang biktima sa ulo. Dali nga gidala ang biktima sa Danao Provincial Hospital ug gibalhin sa VSMMC. – /GMR) (BANAT NEWS)