CEBU, Philippines – Hingpit na’ng gitangtang sa Kapitolyo ang kontrobersyal nga “NEVER AGAIN…” banner sa Cebu International Convention Center sa Dakbayan sa Mandaue.
Si Ethel Natera, ang tigpamaba sa Kapitolyo, nagkanayon nga ang mga kawani sa Provincial General Services Office ang nagtangtang sa banner kadlawon na kagahapon agi og respeto sa kalihukan sa Jesus Reigns Ministries nga ipahigayon karong adlawa sa parking lot sa CICC. “Lain man sab tan-awon nga naa to,” matud ni Natera.
Dugang niya nga daan na’ng nagkasabot ang Kapitolyo ug ang grupo’ng Cebuanos for Good Governance and Development (CGGD) kinsa niangkon nga mao’y nagbutang sa banner nga tangtangon usa kini.
Hinuon, matud sa tigpamaba sa CGGD nga si Renil Oliva nga daku ang posibilidad nga ibalik pagtaud ang banner human makakuha sila sa mga requirement sama sa permit.
“Mirespeto lang pud mi sa ila’ng event,” sigon ni Oliva nga nahinabi sa Banat News.
Nahimo’ng kontrobersyal ang mao’ng banner sukad nitumaw kini sa niagi’ng buwan.
Si Gobernador Hilario Davide III wala nisupak sa pagbutang niini tungod kay uyon kini sa kawsa sa iya’ng administrasyon.
Hangtud karon, wala gihapon nagamit ang nagkantidad og kapin P840 milyones nga CICC sanglit nakaangkon kini og daku’ng danyos human niigo ang linog ug bagyo’ng Yolanda niadto’ng tuig 2013. – /GMR) (BANAT NEWS)