70 ka libudsuroy sa Mandaue gihipos

CEBU, Philippines – Gihipos na sa kagamhanan sa Dakbayan sa Mandaue ang 70 ka mga batang babaye ug lalaki nga nagpanuigon og 15 anyos paubos nga naglibudsuroy adlaw ug gabii sa plaza, karaang merkado sa Barangay Centro, Mantuyong ug Tipolo.

Si Purisa Tabuac, focal person sa Violence on Women and Children and Anti Trafficking in Person sa dakbayan miingon nga peligro sa maong mga bata nga magpuyo diha sa aseras.

Ang mga bata gidala sa Home of Mandaue for Street Children sa Pagasa Center nga  nahimutang sa Sitio Dunggoan sa Barangay Basak sa maong dakbayan.

Si Tabuac miingon nga gisagol lamang nila ang mga batang babaye ug lalaki sa pagkakaron tungod kay nagpadayon pa man ang kaugmaran sa Phase 2 pinaagi sa pagpatukod sa building alang sa mga batang babaye.

Ang compound adunay  kaugalingong playground  aron makaduwa ang maong mga bata samtang sila atimanon sa dakbayan. (Romeo T. Limpangog/EIM)(BANAT NEWS)