CEBU, Philippines - Nakabsan sa iyang kinabuhi sa sulod sa tambalanan ang usa ka electrician human kini natagakan og hollow block samtang kini nag-ayo sa temporaryong elevator diha sa 22 ka andanang gitukod nga building sa Aviner Residence Building sa Archbishop Reyes Avenue, Barangay Lahug ning dakbayan sa Sugbo.
Ang namatay mao si Martin Villacencio, 25, taga Lutopan dakbayan sa Toledo nga nagtrabaho ubos sa Vineyard Construction.
Wa pa hinuon matino kun ang maong construction firm mao pa gihapon kadtong adunay duha ka trabahador nga natagak samtang nagmasilya sa gitrabaho nilang simbahan sa Capitol Site sa miaging semana.
Matud pa ni Senior Police Officer 2 Rommel Bancog, imbestigador sa Homicide Section sa Cebu City Police Office nga nahinabi sa Banat News, nag-ayo sa ground floor ang biktima dihang kalit lang kining natumba human natagakan og hollow block gikan sa nagtrabaho sa taas nga bahin sa edepisyo.
Gidala kini sa Perpetual Succuor Hospital apan paglabay sa pipila ka minutos nakabsan kini sa kinabuhi gumikan sa grabeng bun-og sa ulo.
Ang manghod sa biktima nga si Jhonjie, 21, nga nagtrabaho usab sa maong kompanya mitug-an sa kapulisan nga dili sila interesadong mopasaka og kaso human sila gitabangan sa tanan nga galastohan sa ilang agalon. (BANAT NEWS)