CEBU, Philippines – Dunay pahimangno ang Department of Environment and Natural Resources (DENR)-7 sa tanang magpapili sa umaabot nga eleksiyon nga dili ipanglansang sa mga punoan sa kahoy ang ilang mga campaign materials.
Ang ahensiya padayon sa ilang gihimong monitoring sa tanang mga kahoy nga gipataptan og mga campaign materials niadtong mga kandidato nga magpapili sa May 2016 elections.
Nagkanayon si Eddie Llamedo, OIC Chief sa Planning and Management Division sa DENR-7 niadto pang buwan sa Hunyo sila nagsugod og monitor kay daghan na sila og nabantayan nga adunay mga kandidato ang nagpatapot sa ilang mga hulagway sa punoan sa mga kahoy.
Bisan pa man nga dili sila ang nagbutang niini ug ang mga supporters lang sa kandidato, apan silang mga kandidato ang manubag ug pahamtangan og silot. Base sa Section 3 sa Republic Act 3571, gidili gyud ang pagputol, pagsamad ug pagguba sa mga kahoy ilabi na niadtong mga nahimutang sa pampublikong lugar.
Hugot nga gimonitor karon sa ahensiya diin daghan og kaso sa pagpamutang og streamer, tarpaulin sa mga kahoy mao ang Osmeña Boulevard, Escario, Natalio Bacalso, General Maxilom Avenue, M. Velez ug V. Rama.
Ang pagsamad sa mga punoan sa kahoy sama sa paglansang nagbutang niini sa peligro nga masudlan og kagaw ug fungi ug kini makapatay niini.
Ubos sa Presidential Decree 953 mamahimong mapriso ang molapas sa maong balaod sulod sa unom ka buwan hangtod sa unom ka tuig o multa nga P500-P5,000. Giawhag ni Llamedo ang publiko nga kuhaan og hulagway ang mga posters nga gipangtapot sa mga punoan sa kahoy ug ipadala sa ilang buhatan aron magsilbing ebidensya. – /EIM) (BANAT NEWS)