CEBU, Philippines – Giawhag sa Cebu City Disaster Risk Reduction Management Council (CCDRRMC) ang katawhan ug tag-iya og dakong balay patigayon nga dili mag-panic kun mobuto ang Mt. Kanlaon didto sa Negros Oriental.
Kini human nakadawat ang CCDRRMC og pahibalo gikan sa Philippine Institute of Volcanology and Seismology (PHILVOLCS) nga giisa ang alert level No. 1 sa Mt. Kanlaon niadtong Lunes human nga kini nibugwak og gamay nga lahar sa baba sa bulkan.
Matud ni CCDRRMC Executive Director Simeon Romarate nga dugay na sila nagpakatap og impormasyon kalabot sa pagpangandam sa linog.
Gibutang karon sa standby status ang tanang mga volunteers ug miyembro sa disaster response team sa siyudad.
Giawhag ni Romarate ang publiko nga dili mag-panic kun mobuto ang maong bulkan.
Base sa Kanlaon Volcano seismic network, nagsugod pagdahunog ang bulkan pasado alas 9 sa gabii niadtong Lunes sud sa 30 ka minutos ug gisundan kini pagbugwak og baga nga aso nga gibana-banang usa ka kilometro ngadto sa usa ka kilometro ug tunga ang gihabugon.
Nabatyagan ang pagdahunog sa pagbuto niini diha sa Barangay Pula, Canlaon ug adunay upat ka volcanic earthquakes nga narekord ang PhiVolcs sa wala pa mahitabo ang pagbugwak sa aso.
Gawas usab sa Negros Oriental, nakasinati og 3.4 magnitude nga linog dinhi sa Central Visayas kagahapon diin ang epicenter nahimutang sa Inabanga, Bohol. – /EIM) (BANAT NEWS)