CEBU, Philippines - Ang kagamhanan sa dakbayan sa Talisay moapud-apod og mga television sets ngadto sa mga Day Care Centers sa pipila lang ka barangay sa siyudad.
Si Konsehal Socrates Fernandez, tsirman sa Committee on Social Services, niduso og resolusyon alang sa pag-donate sa mga TV sets sa mga barangay.
Apan ang resolusyon ni Konsehal Fernandez mopahatag lang og TV sets sa mga Day Care Centers sa Barangay Camp 4, Dumlog, Jaclupan, Lawaan III, Manipis, Campinsa, Mohon, Linao, Tanke, ug Tapul.
Matud pa ni Fernandez nga ang gibasehan niya sa iyang resolusyon mao ang report sa taga Department Social Welfare and Development (DSWD).
Si Bulacao Barangay Captain Raul Cabanero nga maoy presidente sa Association of Barangay Council (ABC) nipasabot nga ang 10 ka barangay lang ang ilang gihatagan kay wala pay TV sets ang ilang Day Care Centers.
Matud ni Cabañero nga ang TV sets dako og ikatabang sa kabataan aron mulambo pa ang ilang kaalam sa high tech nga panahon. Ang resolusyon ni Fernandez ang gi-aprubahan sa konseho. (BANAT NEWS)