Mga kawani sa Mandaue hatagan og cash incentive

CEBU, Philippines - Ang kapin sa 500 ka kawani sa kagamhanan sa dakbayan sa Mandaue hatagan og cash gifts nga katumbas sa usa ka buwan nila nga sweldo ug kini ihatag kanila sa wala pa’y Pasko.

Apan ang mga job order workers dili makadawat sa mao nga cash incentive tungod kay higpit kini nga gidili sa Commission on Audit sanglit wala sila isipa nga mga kawani.

Mao kini ang hinungdan nga nasagmuyo kaayo ang mga job order workers pagkasayod nga dili sila apil nga makadawat sa cash incentive nga katumbas sa usa ka buwan nga sweldo.

Sagad sa mga job order workers anaa madestino sa mga trabaho nga hago kaayo, sama sa mangolekta og basura ug uban pa nga mga bug-at nga trabaho.

Ang mga sakop sa Mandaue City Council mipasar sa ordinasa nga nigahin og P10.8 milyones nga maoy kuhaan sa cash incentive sa mga regular nga kawani ug sa pipila ka opisyal sa dakbayan.

Ang Mandaue City adunay 562 ka kawani nga ang labing ubos kanila nagdawat og labing menos P10 mil nga sweldo ug nagpasabot nga kini usab maoy ilang madawat nga incentive.

Si Konsehal Diosdado Suico mipasabot ngano nga ang mga job order workers dili apil sa mahatagan.

“They don’t have civil service appointment so they can’t  avail of the incentive. The Law prohibits it,” matud sa konsehal nga maoy tsirman sa committee on budget and appropriation.  (BANAT NEWS)