CEBU, Philippines - Laing mga mananagat na usab ang nadakpan sa kapulisan sa lungsod sa Madridejos human ilegal nga nangisda diha sa maong lungsod.
Ang mga mananagat naggikan sa lungsod sa Santa Fe ug Bantayan nga ilegal nga misulod ug nangisda sa kadagatan sa Madridejos.
Matud pa ni Police Officer 3 Julio Cesar Seares, desk officer sa Madridejos Police nga nahinabi sa Banat News nga daan na nilang gihigpitan ang pagbantay sa kadagatan sa lungsod tungod kay abunda kini sa isda nga buraw niining mga panahona. Kauban sa kapolisan ug Bantay Dagat, naghimo sila og seaborne patrol nga niresulta sa pagkasikop sa napulo ka tawo ug tulo ka panagatan ug mga pamo nga pukot ug tunga sa kahon nga isdang buraw ang ilang nasakmit.
Si Seares miingon nga human nakabayad og P2,800 nga multa ang matag usa, nakagawas ra sab sa prisohan ang mga suspetsado.
Ang ilang kalapasan mao ang municipal ordinance sa maong lungsod nga nagdili sa pagpanagat nga walay permit.
Kung kahinumduman nga sa nanglabay nga semana ug mga adlaw daghanan usab nga mananagat ang nadakpan sa kapulisan sa maong lungsod gumikan sa paglapas gihapon sa maong ordinansa. Apan kun hingpit na nga mapatuman ang Republic Act 10654 o ang giamendar nga RA 8550 kon Fisheries Code of the Philippines, ang mga local government units mahimong makaangkon og mas dagkong porsiyento gikan sa multa sa mga malapason. Ang kinaubsan nga multa di momenus P1 milyon hangtud P45 milyones ug pagkabilanggo ang mamahimong atubangon sa maong mga mananagat. (BANAT NEWS)