CEBU, Philippines - Walay nasinati nga kagubot ang dakbayan sa Lapu-Lapu atol sa duha ka adlaw nga pangilin sa Birhen sa Regla nga gihimo niadtong Biyernes ug Sabado. Matud pa ni Senior Superintendent Armando Radoc, acting police chief sa Lapu-Lapu City Police Office malinawon ang pagsaulog sa pista. "Peaceful ta ‘ron, usa ra atong narekord nga insidente sa pickpocket. Mas gi-maximize nato ang police force," matud ni Radoc ngadto sa Banat News.
Nagkanayon si Radoc nga kapin sa 400 ka polis ang gi-deploy alang sa seguridad sa publiko nga nagselebrar sa tinuig nga pista gikan sa pagsugod hangtud nga nahuman ang mga kalihokan.
Samtang si Frank Brazil, hepe sa City Traffic Management Systems miingon nga nasinati lang ang problema sa kahuot sa kadalanan matag mahuman ang Santos nga Misa diha sa Birhen sa Regla Parish.
Anaa sa 50 ka traffic enforcers ang gi-deploy diha sa mga lugar diin adunay mga kalihokan.
Samtang aron di makadugang sa problema, adunay mga dalan nga wala paagii ug mga pasaheroan ug traysikol sama sa Lopez-Jaena ug B.M. Dimataga street, nga kalsada nagpalibot sa gihisgutang simbahan. (BANAT NEWS)