Way luya-luya sa kampanya batok drugas — Davide
CEBU, Philippines – Si Gobernador Hilario Davide, III nanghinaot nga maningkamot pa ang mga local government unit (LGU) ug mga polis sa kalungsuran ug siyudad kinsa wala mu-top o makadawat og award sa kampanya batok sa ginadiling drugas.
Matud ni Davide nga naa pa sa unang round ang “Just Say No Program” ug nanghinaot siya nga magpadayon kini ug kadtong mga LGU ug mga police station nga wala mapili dili unta maluya.
Sayo pa si Bokal Ivy Durano-Meca, vice chairman sa Cebu Provincial Anti-Illegal Drug Abuse Commission (CPADAC) mibutyag nga usa sa problema nga ilang nasugatan mao ang pagpakunhod sa demand sa ginadiling drugas.
Si Davide nagkanayon nga ang kabataan angayan gyud nga edukahon kabahin sa ginadiling drugas ug ang komunidad dunay dakong obligasyon sa pagpakabana sa pagsumpo sa problema.
Matud ni Davide nga kun ang komunidad dili magpakabana, ang programa sa gobiyerno batok sa ginadiling drugas dili usab kini magmalampuson.
Sa gipahigayong awarding ceremony sa “Just Say No Program” sa probinsiya, ang mga top 1 o best performing police station sa municipal level ug city level ug best performing LGU sa municipal level ug city level gihatagan og trophy ug tag P200 mil nga cash reward. Samtang kadtong wala mo-top 1 nakadawat lang sila og plaque.
Ang top 1 sa best performing police station sa municipal level mao ang Liloan Police Station samtang sa city level ang Danao City Police Station maoy top 1. Sa best performing LGU municipal level ang top 1 mao ang lungsod sa Liloan ug sa city level ang top1 mao ang dakbayan sa Danao.
Ang kabarangayan nga nag-implementar usab sa maong programa nakadawat usab og plaque isip pasidungog ug paghangop sa probinsiya ngadto kanila. (BANAT NEWS)
- Latest
