One way traffic sa 1st Mactan-Mandaue Bridge

CEBU, Philippines - Ang Department of Public Works and Highways (DPWH) mopatuman og “one way traffic” sa mga sakyanan nga moagi sa First Mandaue-Mactan Bridge karong sunod semana.

Kini tungod kay ang DPWH mopahigayon og pag-ayo sa taytayan.

Si Architect Florentino Nimor, hepe sa Mandaue City Planning Office, miingon nga gipahibalo sila sa kadagkoan sa DPWH sa mao nga kalamboan aron usab makahimo og pagpangandam.

Si Glenn Antigua nga maoy operation chief sa Traffic Enforcement Agency of Mandaue (TEAM) miingon nga dili dunganon sa pag-ayo ang tibuok taytayan.

Kini aron nga ang pikas lane sa taytayan maagian pa sa mga sakyanan samtang magpadayon ang pag-ayo pinaagi sa pagpatuman og one-way traffic.

Sa buntag ang mga sakyanan nga tugotang makaagi sa Mandaue-Mactan Bridge mao kadtong mopaingon sa dakbayan sa Lapu-Lapu ug kadtong mopaingon sa dakbayan sa Sugbo ug ubang dapit adto paagion sa Marcelo Fernan Bridge.

Pagka hapon, mobali ang sitwasyon kay ang mga sakyanan nga mopaingon sa dakbayan sa Sugbo mao na usab ang paagion sa one way traffic diha sa Mactan-Mandaue Bridge.

Ang katuyoan niini mao ang paghatag og kasayon sa mga trabahante sa Mactan Export Processing Zone (MEPZ) sa ilang pagbiyahe alang sa ilang pagtambong sa trabaho sayo sa buntag ug pagpauli inigkahapon.  (BANAT NEWS)