CEBU, Philippines - Giawhag sa Konseho sa Dakbayan sa Sugbo ang Cebu City Transportation Office (CCTO) nga dakpon gyud ang mga drayber sa sakyanan nga mobabag sa mga pedestrian lane sa dakbayan sa Sugbo.
Si Konsehal Dave Tumulak, presiding officer sa Local Disaster Risk-Reduction Management Council, nakabantay nga wala kaayo ipatuman sa mga traffic enforcers ang City Ordinance 2207.
Kining mao nga ordinansa nagdili nga babagan sa mga sakyanan ang pedestrian lanes nga gitagana alang sa mga tawo nga molabang sa karsada.
Base sa ordinansa kadtong mga motorista nga madakpan sa pagbabag sa agianan sa mga tawo multahan sa kantidad gikan sa P3 mil ngadto sa P5 mil.
Gipakita ni Tumulak sa mga kauban niyang konsehal pinaagi sa video ang sitwasyon nga ang mga tawo, mga tiguwang ug mga tinun-an, nga naglisud pag-agi sa pedestrian lanes kay gibabagan sa mga sakyanan. Ang tukma nga lagda sa pagmaneho’g sakyanan mao nga ang pangunahan nga ligid dili g’yud gani ipaabot sa badlis sa pedestrian lanes apan daghang drayber, sagad mga PUJ ug taxi, mibaliwala ra niini.
Si Atty. Rafael Christopher Yap, ang pangulo sa City Transportation Office, miingon nga ilang tumanon ang awhag sa konseho apan mipadayag hinuon og kabalaka nga dili kaayo sila epektibo nga makapatuman tungod sa kakuwang og mga sakop.
Ang CCTO aduna lay mga 300 ka traffic enforcers ug ang maong gidaghanon kuwang kaayo nga idestino sa lainlaing dapit sa dakbayan, ilabi na sa nagkadaghang mga sakyanan.
Matud ni Yap nga mas palabihon sa mga traffic enforcers ang pagdumala sa trapiko kay sa pagpanakop aron dili mosamot ang problema sa panaghuot sa mga sakyanan. Ang konseho sa dakbayan moawhag sa Association of Barangay Council (ABC) nga patabangon ang ilang mga tanod sa pag-abag sa pagpahapsay sa trapiko sa ilang mga dapit. (Sheriza Mae R. Uy/RUB)
Bike lanes subhan
Gikatakda na nga ilusad sa kagamhanan sa Dakbayan sa Mandaue ang pagbutang og bicycle lanes sa pinili nga mga dalan sa dakbayan aron adunay luwas nga kaagian ang mga magbisekleta.
Apan dili tanan ang uyon niini tungod kay adunay mga drayber sa traysikol ang supak niini tungod kay maapektahan ilang panginabuhi niini kun ang mga tawo magbisekleta na lang.
Si Rosendo Duran, 43, taga Barangay Cabancalan nga namasahero og traysikol nagkanayon unahon unta sila sa pagtagad pinaagi sa pagbutang og tricycle lanes sa mga national roads.
Apan si Adolino Adulfo, 33, taga Barangay Basak, dako ang kalipay pagbutang og bicycle lanes kay silang magbisekleta paingon sa ilang trabaho malayo sa aksidente. Si Florentino Nimor Jr. nga maoy city planning officer sa dakbayan mipahibalo nga sa unang semana sa bulan sa Disyembre subhan ang bicycle lanes sa siyudad.
Ang bicycle lane manukad sa Mandaue City Hall lahos sa dalan Sotero B. Cabahug sa Ibabao -Estancia sa eskina sa dalan R. Colina sa Ibabao Estancia.
Aduna say bicycle lane sa dalan A. del Rosario sa Barangay Guizo ug adto kini molapos sa mga dalan sa Reclamation Area padung sa Cebu International Convention Center (CICC) ug Parkmall. (BANAT NEWS)