CEBU, Philippines - Gikwestiyon sa mga manindahay sa Pier 3, Tinago, Cebu City ang pagdemolis sa Prevention Restoration Order Beautification Enhancement (PROBE) Team sa 22 ka stalls daplin sa Arellano Blvd.
Matud ni Jade Jumawan, pangulo sa Port Area Street Traders Association (PASTA), nga nakakuha na sila og temporary restraining order sa korte dayon ila gisang-at ang injunction aron mapugngan ang nag-ung-ong nga demolisyon.
Apan si Cesar Gelig, in-charge sa operation sa PROBE Team, niklaro nga igo lang sila nagpatuman sa mando sa ila’ng labaw.
Gipasabot ni Gelig nga ila lang gilimpyohan ang sidewalk nga gigamit na sa mga manindahay.
Nagpaabot ang grupo ni Jumawan nga makakuha og injunction aron dili sila mahilabtan sa ila’ng legal nga panginabuhian.
Hinuon matud ni PROBE Team assistant head Wendelle Cenas nga hapsay ug malinawon ra ang clearing operation.
Si Barangay Tinago Kapitan Joel Garganera uwahi na nga nakahibawo sa adlaw sa demolisyon apan kahibawo na siya daan nga adunay injunction nga gisang-at sa korte. Igo na lang si Garganera gipahibawo sa PROBE Team nga nilapas na ang status quo nga 20 ka adlaw. (BANAT NEWS)