Dry run sa rota sa IEC karong Domingo, Lunes
CEBU, Philippines – Ipahigayun karong Domingo ug Lunes ang duha ka adlaw nga transportation dry run alang sa International Eucharistic Congress 2016.
Ang dry run sugdan ala-una sa hapon hangtud sa alas 8 sa gabii sa Domingo ug alas 6 sa buntag hangtud sa alas 10 sa buntag sa Lunes.
Sulod niini’ng panahona gidid-an nga makaagi ang mga pribado’ng sakyanan sa St. John Paul Avenue gikan sa eskina sa Ayala Access Road hangtud sa eskina Salinas Drive.
Matud ni Atty. Raphael Christopher Yap, labaw sa Cebu City Transportation Office, mga public utility jeepney, taxi, lakip ang mga buses ang tugutan nga makaagi sa lugar aron ila’ng masuwayan kung unsa’y sangputanan ug aron makahimo sila og mga rekomendasyon kung unsa’y mga angayan pa nga buhaton sa dili pa ang IEC 2016 karong Enero 24-31, 2016.
Ang magdala og pribado’ng sakyanan nga motambong sa kalihukan, mahimo ra nga iparada sa Ayala Parking Area o kaha sa SM City Cebu ug mahimo na sila’ng magsakay og sakyanan de pasaheroan nga gitugutan nga moagi sa lugar.
Gikatakda usab ang rerouting sa uban dapit nga pahigayunan sa IEC sama sa Capitol, Sports Center ug Plaza Independencia.
Samtang ang IEC Committee nga gipangulohan ni Fr. Wendell Balbuena nipahibawo nga aduna sila’y 100 ka buses nga sakyanan sa tanang partisipante ug gibahin kini sa lima ka color aron mao’y modala sa mga partisipante ngadto sa nagkadaiyang destinasyon.
Gibutyag ni Balbuena, aduna usab sila’y mga buses nga gitagana alang sa mga lugar nga adunay ipahigayon nga kalihukan sa IEC sama sa Opening Mass, Youth Day Overnight, Benediction sa Plaza Independencia, Mass at Provincial Capitol, First Holy Communion at Cebu City Sports Center ug katapusang Misa sa Statio Orbis sa South Road Properties.
Mokabat sa 120 ka buses sa Ceres Liner ang mokuha gikan sa airport ug sea port sa mga partisipante paingon sa venue.
Matud ni CCTO operation head Jonathan “Joy” Tumulak nga makamugna gyud kini nga trapiko.
Ang mga buses sa Ceres adto parking sa ila’ng garahe ug mo-pick up lang kini kung asa ang mga delegado gikan nga buot motambong sa IEC.
Ang kadagkuan sa Lapu-Lapu traffic ug Mandaue traffic nga gipangulohan ni Frank Brazil ug Glen Antigua nipasalig nga motabang ug may pagpangandam sab sila nga buhaton sa umaabot nga kalihukan sa IEC 2016. – /GMR) (BANAT NEWS)
- Latest
