CEBU, Philippines – Sikop sa buy-bust operation sa mga sakop sa Tuburan Police Station ang duha ka magsuon nga nalambigit sa pagpayuhot og ilegal nga drugas sa Barangay 7 pasado alas 5 sa nakalabay nga buntag.
Atol sa operasyon bitbit sa kapolisan ang search warrant batok ni Jose Sato Naingue, 39, nga giila nga notado’ng nagnegosyo og drugas sa mao’ng lugar.
Apan lakip sa gidakop ang manghud nga si Wilfredo Naingue, 35, nga mao’y nidawat sa P300 nga marked money sa kapolisan.
Human nakatunol sa usa ka pakete sa gituohang drugas si Jose, dali sab dayon nga nihamag ang kapolisan ug nadakpan ang duha.
Matud ni Senior Police Officer 2 Alvin Abay-abay sa Tuburan Police Station, nga nahinabi sa Banat News nga notado na gyud sa ila’ng dapit si Jose nga namaligya og shabu kinsa taudtaud na usab nila nga gipanid-an.
Nakuha sa mga awtoridad sulod sa balay sa mga suspek ang 26 ka medium-size ug 16 ka gagmay nga pakete sa gituohang shabu nga kantidad og P76, 500.
Gitanggong na sa selda sa Tuburan Police Station ang magsuon kinsa mag-atubang og tukma’ng kaso. – /GMR) (BANAT NEWS)