CEBU, Philippines – Patay ang drayber ug angol ang angkas niini human nasampak sa waiting shed ang motor nga ila’ng gisakyan pasado alas 11 sa niagi’ng gabii sa Abucayan, Balamban.
Ang namatay mao si Gelford H. Apas, 23, drayber, samtang gi-refer sa Vicente Sotto Memorial Medical Center si Helmar H. Delima, 20, backrider, gumikan sa grabe’ng kadaut sa lawas.
Sumala pa sa imbestigasyon nga ang duha sakay sa motor ug padulong sa dakbayan sa Toledo.
Pag-abot sa Abucayan, kalit lang nawad-an og kontrol ang drayber sa motor hinungdan nga nasampak sa waiting shed.
Ang angkas nalabay sa motor ug na-igo sa semento nga poste sa waiting shed samtang ang driver nagkuyog sa iya’ng motor nga nalamba sa karsada.
Wala maglihok ang duha diha’ng gitabang sa mga residente sa lugar nga mao’y nanawag og ambulansya sa Lungsod sa Balamban ug sa kapolisan.
Samtang usa ang patay ug tulo ang samdan sa panagbangga sa duha ka motorsiklo sa D. Macapagal Highway, sa Poblacion, Toledo City sa nakalabay’ng gabii.
Giila ang namatay nga si Jaile Campo, 33, ulitawo, taga Cabankalan, Sangi, Toledo, kinsa nakaangkon og grabe’ng bun-og sa ulo.
Samtang ang nangaangol mao sila si Giant King Roche, 20, nagmaneho sa laing motorsiklo nga may angkas nga sila si Jerson Arrojo, 31, ulitawo, Mike Glenn Arrojo, 29, ulitawo nga taga Awihao, Toledo.
Sa imbestigasyon ni Police Officer 3 Romeo Jaranilla sa Toledo City Traffic Division nasayran nga gikan sa Poblacion ang grupo ni Roche ug paingon unta sa Awihao aron mobilar apan pag-abot sa lugar nahitabo ang insidente.
Gikan usab sa Ibo si Campo nga kusog nga nagpadagan sa gimaneho’ng motorsiklo ug gituohang ni-overtake sa nag-una nga traysikol ug wala kabantay nga adunay kasugat ug wala na nakabawi hinungdan nga nalabay ug napantok ang ulo sa karsada.
Dali’ng gidala ang mga biktima sa Toledo City Hospital ug ang uban gibalhin sa Vicente Sotto Memorial Medical Center. (BANAT NEWS)