CEBU, Philippines – Nakadala gyud og P100,000 ang tulo ka tawo nga niilad sa usa ka retirado’ng maestra aron kobrahon gikan sa iya’ng bank account ang kwarta pasado alas 2 sa niagi’ng hapon sulod sa usa ka mall sa Dakbayan sa Carcar.
Igo na lang ni-report sa kapolisan si Luzviminda Divinagracia, 67, taga Ocaña, Carcar, sa iya’ng kasinatian kay wala siya makalihok ug daw gi-hypnotized sa mga suspek kinsa nagpaila kaniya nga sila si Gilbert Abad, 5’7” ang gitas-on, kasarangan og panglawas; Minche Getapalane, 4’11” ug kasarangan ang gidak-on ug usa ka Rosales, 5’ ang gitas-on ug taas og buhok.
Niduol ang tulo sa biktima ug nagpaila nga kaila sa iya’ng bayaw nga lalaki ug sa ila’ng panag-estoryahanay nakombinsir ang biktima nga mokuyog nila.
Gipasakay sa mga suspek ang biktima ug nagpunay sila og estorya hangtud nga nangutana sila kung naa ba siya’y passbook aron ma-withdraw ang iya’ng kwarta.
Nitangdo ra pud ang biktima ug diha’ng na-withdraw na ang kwarta giingnan siya sa tulo nga ipasulod sa envelop lakip na sa sing-sing, ariyos, kwentas ug cellphone.
Niadto’ng higayuna nakabantay na siya nga giilad siya apan nahibulong siya nga dili gyud siya makalihok ug dili gani siya maka-estorya sa mga tawo nga nailad siya.
Diha’ng nakabiya na ang suspek didto pa siya naulian ug nideretso siya og taho sa kapolisan sa nahitabo.
Samtang nagkurog pa sa hilabihang kahadlok ang usa ka negosyante nga biktima sa pagpanulis sa nagsakay og motorsiklo nga armado’ng tulisan ug gisakiyo ang mokabat sa P111,000.
Ang pagpanulis nahitabo sa Poblacion Oriental, Consolacion alas 9 pasado sa niagi’ng Huwebes sa gabii diin ang biktima nga nagsakay og habal-habal kalit lang gitionan og kalibre .45 sa duha ka tulisan.
Si Police Officer 3 Arthur Ariate sa Consolacion Police Station niila sa biktima nga si Jocelyn Semblante, 34 anyos, minyo nga nagpuyo sa Poblacion Oriental kinsa gikan pa naninda sa merkado publiko diha’ng gitulis atubangan sa ila’ng panimalay sa duha ka lalaki nga nagsakay og XRM nga kolor itom ug puti nga motorsiklo.
Nanaug ang nag-angkas sa motorsiklo nga pulos nag-helmet ug giduol ang biktima dungan ang pagtion og armas ug nideklarar nga tulis dayong pangayo sa shoulder bag nga gisudlan sa salapi nga halin sa pagpamaligya og karne ug tulo ka mahalon nga cellphone.
Gihulga nga pusilon ang biktima kun magdumili sa paghatag hinungdan nga wala na’y nahimo gawas sa pagtugyan na lang sa iya’ng shoulder bag.
Dali’ng nisakay og balik sa nagpaabot nga motorsiklo ang mga tulisan. (BANAT NEWS)