P400M nagasto sa Yolanda rehab

CEBU, Philippines - Kapin na sa P400 milyones ang nagasto sa kagamhanan sa probinsiya sa Sugbo sa mga proyekto ug programa human sa bagyo’ng Yolanda duha na ka tuig ang nakalabay.

Si Baltazar Tribunalo, hepe sa Provincial Disaster Risk Reduction and Management Office (PDRRMO), nibutyag nga sa kinatibuk-ang tuig sa 2014, nikabat sa P269,036,746 ang nagasto sa probinsiya samtang P148,695,276 gikan sa Enero hangtud Septiyembre karong tuiga.

Kini naglakip sa hinabang pinansiyal ngadto sa mga apektado’ng barangay ug sa 16 ka lokal nga kagamhanan sa probinsiya nga naapektuhan sa bagyo.

Ang ubang pundo gigahin ngadto sa agrikultura ug livelihood projects, panglawas ug uban pa’ng social services ug suporta alang sa pagpaayo sa mga barangay infrastructure project, programa alang sa pagprotektar sa kalikupan, DRRM trainings ug capacity building activities ug uban pa’ng cultural ug sports activities ug shelter assistance sa mga biktima.

Gipaambit usab ni Tribunalo nga ang mga LGUs may climate and disaster risk reduction and management plan na base sa ila’ng target sa tuig 2015.

Katambayayong sa probinsiya ang Ramon Aboitiz Foundation Inc. ug ubang non-governmental organizations ug mga ahensiya sa nasudnong kagamhanan. (Brenda D. Batuto/GMR)(BANAT NEWS)