CEBU, Philippines – Mga langgam nga sayaw-sayaw nga magbatogan panahon sa gabii diha sa mga kable sa kuryente sa dalan Colon, Cebu City dili angay hilabtan sumala pa sa Department of Environment and Natural Resources-7.
Ang tigpamaba sa DENR, Eddie Llamedo nagkanayon nga dako kaayo og tabang pagkontrolar sa populasyon sa mga langaw, lamok ug uban pang insekto ang maong mga langgam.
Matud pa niya, di angay ikahibulong nganong nagbalhinbalhin og katulganan ang maong mga langgam sud sa nanglabay nga mga buwan apan sagad sa ilang gitugdonan diha ra gyud sa downtown area.
Sumala pa ni Llamedo ang maong mga langgam giganahan sa maong dapit tungod ba kaha sa kaabunda sa mga langaw nga gikan sa mga basura nga mahimo nilang kan-on ug uban pang rason nga haom sa ilang kinaiya.
Matud pa ni Llamedo, dili ra hinoon magdugay sa pagpuyo ang maong sayaw diha sa downtown area tungod kay magbalhin-balhin lamang sila diin adunay abundang pagkaon.
Gipasidan-an ang publiko nga kadtong mopasipala sa mga mananap-ihalas mahimong mapasakaan og kalapasan sa Republic Act 9147 kon Wildlife Conservation and Protection Act.
Apan pipila ka mga negosyante sa lugar nibati na og kabalaka, tungod sa grabe kadaghan sa maong mga langgam nakahasol na kini kanila tungod sa ilang mga iti nga adto matagak sa ilang mga establisamento ug sa kalsada. – /EIM) (BANAT NEWS)