Mga bata nga gigamit sa krimen angay’ng tagdon na

CEBU, Philippines – Ang tigpamaba sa kaparian dinhi sa Sugbo misugyot nga angay’ng magtagbo na karon ang kadagkoan sa mga ahensiya sa kagamhanan ug simbahan aron hisgotan ang paggamit na sa mga bata sa mga krimen.

Si Msgr. Joseph Tan, tigpamaba sa Archdiocese of Cebu, mihimo niining maong sugyot human nga adunay bata nga gigamit sa pagkuha sa bag sa manag-uyab sulod sa usa ka kan-anan.

Matud ni Tan nga tungod sa kalinghod pa sa pangedaron sa kabataan dali ra sila nga mandoan paghimo og salaod.

Nagtuo si Tan nga ang tumang kakabus maoy nagtukmod sa ubang ginikanan nga pabuhaton og daotan ang ilang mga anak sama sa pagpangawat ug pagpayuhot og ilegal nga drugas.

Sumala pa ni Tan nga kinahanglan na gayud maghiusa ang kadagkoan sa kagamhanan, simbahan, non-government organizations aron tun-an ang sitwasyon sa mga kabus nga pamilya.

Kini aron nga kapangitaan og paagi nga sila matabangan, ilabi na ang kabatan-onan nga maoy kasagaran nahimo nga biktima.

Si Tan miingon nga kun pasagdan lang ang mga bata nga magdako ug mabuhi diha sa kadalanan, angayan kini nga kabalak-an tungod kay basin mahimo na usab unya sila nga problema sa kagamhanan ug sa katilingban sa umaabot nga adlaw. (BANAT NEWS)