CEBU, Philippines – Unom ka tinun-an sa elementarya sa mga tunghaan sa Sugbo ang nagrepresentar sa Pilipinas atol sa nagpadayong World Robotics Olympiad (WRO) nga atua gipahigayon sa Qatar ug matapos ugmang adlawa.
Ang Team-A gilangkoban nila ni Andre Perez, Trisha Nicole Alejandrino ug John Lechter Alerta samtang ang Team B members mao sila si Prinze Charsev Camaongay, Jose Mario Nudalo ug Zowee Mhey Aquino. Ang maong mga estudyante parehong grade 4 ug lima kanila nag-eskwela sa SmartKidz Enhancement Center sa dakbayan sa Danao.
Ang team A midaog kini sa 3rd place atol sa 14th Philippines Robotics Olympiad didto sa North SM EDSA niadtong Septiyembre 11 samtang ang Team B nakakuha sa 5th place. Tungod sa maong kalampusan, sila si Perez, Alejandro ug Alerta uban sa ilang coach nga si Galatico “RD” Camaongay III mibiyahe paingon ngadto sa Qatar diin lakip sila sa Philippine delegation alang sa annual WRO.
Uban usab kanila si Elijah Iligan, Priam Ortega ug John Cartilla, grade 4 sa Caridad C. Labe Center for Excellence sa dakbayan sa Lapu-Lapu nga maoy 1st place sa elementary category. Mga 65 ka eskuwelahan sa nasud ang miapil sa annual competition nga gipasiugdahan sa Department of Education ug Felta-Multimedia Center.
Ang katuyoan sa maong programa mao ang pagpalambo sa interest sa STEM (Science, Technology, Engineering, and Mathematics) disciplines pinaagi sa promotion sa robotics competition. Aron mo-qualify sa WRO, ang moapil nga estudyante kinahanglan nga mag-design og robot nga mag-investigates ug mag-explore sa nagkalainlaing hostile environment. (BANAT NEWS)