CEBU, Philippines - Opisyal nga gipahibalo sa buhatan sa Environmental Management Bureau-7 nga haze-free na ang Metro Cebu.
Ang regional director sa EMB-7 nga si Engr. William Cuñado nibutyag nga luwas na gyud ang hangin sa Sugbo base sa ilang pagsusi.
Si Engineer Cindylyn Pepito, environmental management specialist sa EMB-7, nagkanayon nga haom na sa limitasyon sa National Ambient Air Quality Guideline Values ubos sa RA 8749 o Philippine Clean Air Act ang hangin karon sa Sugbo.
Base sa datus sa EMB kagahapon, ang hangin sa Metro Cebu adunay particle matter (PM) nga may gidak-ong 2.5 micrometer nga miabot na lamang og 16 micrograms per normal cubic meter (µg/Nm3).
“The result is within the interim guideline value of 75 µg/Nm3 based on the DENR Administrative Order (DAO) 2013-13. This implies that the air quality in Metro Cebu continues to improve,” matud sa EMB.
Matud ni Pepito nga padayon gihapon sila sa pag-monitor sa hangin ilabi na nga dunay posibilidad sa forest fires gumikan sa nagkagrabeng El Niño .
Sa bahin sa Department of Health, matud ni OIC assistant regional director Dr. Sophia Mancao nga kinahanglan gihapon ang kanunay nga pagbantay sa panglawas pinaagi sa saktong nutrisyon ug ehersisyo.
Sumala niya nga kadtong adunay sakit sa baga angay maglikay sa mga dapit nga adunay daghang polusyon sama sa aso gikan sa sakyanan. “Safe to go outdoors but let’s keep vigilant,” she said.
Kahinumduman nga ang Metro Cebu nakasinati og light to moderate haze nga gikan sa wildfires sa Indonesia. (Kristine Quintas/EIM)(BANAT NEWS)