CEBU, Philippines - Adunay otso mil ka mga binuhi ug libud-suroy nga mga iro sa dakbayan sa Mandaue ang wala mabakunahi.
Kini maoy pagbanabana sa city veterinarian nga si Dr. Nestor Taasan base sa gihimo nilang survey.
Sumala pa niya, aduna silay na-rekord nga 12 mil ka mga binuhing iro sa mga molupyo sa Mandaue, apan 7 mil lamang niini ang nabakunahan, 5 mil ang wala ug dunay gibanabanang 3 mil ka irong libudsuroy sa 27 ka barangay sa dakbayan.
Sumala pa ni Taasan, nagpadayon ang ilang paglibot sa mga barangay aron mabakunahan ang tanang binuhing iro ug nagpadayon usab ang ilang pagpanakop niining mga libudsuroy nga iro diha sa kadalanan.
Ang dakbayan sa Mandaue napakyas pagkab-ot nga mamahimong rabies free ang dakbayan human nga adunay upat ka mga batang napaakan karong tuiga.
Samtang si Edwin Jumao-as nga maoy in-charge sa city dogpound mihimakak bahin sa nigawas nga balita nga ilang pamatyon ang mga iro nga naa sa ilang kostudiya.
Giklaro niya nga kadto lamang mga masakiton ug di na matabang pa maoy ilang ipaubos sa lethal injection. (BANAT NEWS)