CEBU, Philippines - Dili mominus 50 ka kawani sa nagkadaiya’ng insurance companies ang nagmartsa gikan sa Fuente Osmeña Circle paingon sa Land Transportation Office-7.
Kini nunot sa gimugna sa LTO nga ang ahensiya na ang mopili kung si kinsa nga insurance company ang mo-issue sa Compulsory Third Party Liability Insurance (CTPL).
Alang kanila ang gihimo nga reporma nga gipangamahanan ni LTO Assistant Secretary Alfonso Tan daw sa gimonopoliya ug tungod niini gihulagway nila nga buaya ang LTO ug dili buot nga mokita ang ordinaryo’ng nanginabuhi.
Apan gipasabot ni LTO-7 OIC Regional Director Arnel Tancinco nga gimugna ni Tan ang Memorandum Circular No. AVT-2015-1975 kon Reformed CTPL aron pagwagtang sa mga pagduda nga adunay komisyon ang bisan kinsa nga kawani sa LTO diha sa pagkuha og insurance.
Matud ni Tancinco nga nakadawat og taho si Tan labot sa taga LTO nga giingong konsabo sa mga fixers diin sa kadaghang insurance companies usa o duha lang ang mahatagan og kahigayunan. Gipasabot ni Tancinco nga pinaagi niini mahatagan og higayun ang tanang insurance companies nga accredited sa Insurance Commission nga makuha alang sa CTPL.
Napanglantawan nga sa Enero sunod tuig pa posible mapatuman ang RCTPL gumikan kay sa tunga-tunga ni’ng buwana pa himuon ang bidding kun kinsa ang mag-administrador sa Insurance Commission. (BANAT NEWS)