CEBU, Philippines - Usa ka Chinese national ang gidakop sa Aviation Security Unit (AVSEU)-7 sa Mactan-Cebu International Airport human suway nga mipalusot og mga armas nga walay mga dokumento.
Ang dinakpan naila nga si Chao Ching Hung, 35.Gibutyag ni Senior Superintendent Joselito Salido pangu sa AVSEU-7 alas 4:10 kagahapon sa hapon ang Office for Transportation Security Screening Officer nakabantay sa ilang unang X-Ray sa Domestic Departure kalabot niining mga armas sa langyaw.
Nakita didto ang mga armas nga KG-9 ug Beretta, usa ka magazine sa KG-9 ug .9 mm Beretta pistol ug usa ka gatos nga bala. Ang maong langyaw dunay connecting flight paingon unta sa Taiwan sakay sa Cebu Pacific Airlines sa flight number nga 5J576 paingon sa Ninoy Aquino International Airport (NAIA) ug gikan sa NAIA paingon sa Taiwan pinaagi sa flight number 5J310.
Ipaubos sa imbestigasyon ang dinakpan ilabi na nakalapas kini sa Republic Act 10519 kon Comprehensive Firearms and Ammunitions Law.
Ang mga armas giputos og baga nga lead blanket aron dili ma-penetrate sa x-ray ug di makita sa screening officer sud sa bagahe kay ang makita lamang ang itom nga hulagway sa lead blanket sa maleta. (BANAT NEWS)