CEBU, Philippines - Gi-ambush sa duha ka tawong nagmotorsiklo ang sakyanan sa usa ka customs collector nga niresulta sa pagkaangol sa drayber niini sa miaging gabii diha sa sitio Nonoc, barangay Tabunok, dakbayan sa Talisay.
Ang drayber nga nasamdan sa pagpamusil mao si Proto Bulias, 38, lumad nga taga Loon, probinsya sa Bohol ug stay-in driver ni Gerardo Campo, 55, taga sitio Sto. Niño, Nonoc-Tabunok, Talisay City ug usa ka Custom Port Collector sa Mactan Cebu International Airport.
Laing sakay sa duha mao si Pablito Geraldez, 30, taga Cantao-an, Naga City ug staff sa opisina ni Campo.
Sa inisyal nga imbestigasyon sa kapulisan nasuta nga gikan sa iyang opisina si Campo padung nang mopauli sakay sa iyang sakyanan nga Toyota Hilux nga adunay plakang YHW-471.
Si Geraldez giingong nang-hitch lang sa iyang amu niadtong tungora.
Apan pag-abot nila sa nahisgutang lugar, duha ka tawo nga nagsakay og motorsiklo ang kalit nipaulan kanila og bala.
Bisan pa man sa iyang pagkaangol nakapadayon gihapon sa pagmaneho si Bulias apan gisundan sila sa mga mamumuno hangtud nga naabot gyud sa panimay si Campo ayha pa misibat palayo ang mga suspetsado.
Walay tatsa sila si Campo ug Geraldez apan samdan sa iyang buko-buko si Bulias ug gidala sa Talisay City District Hospital ug gibalhin dayun sa pribadong tambalanan sa siyudad sa Sugbu. Si Police Officer 3 Ferdinand Pablo nibutyag nga sa ilang tan-aw ang tumong sa pagpamusil mao gyud ang nagmaneho sa sakyanan gumikan sa agi sa mga bala nga pulos sa driver side. Gani narekober nila ang lima ka mga kabhang sa kalibre .45 didto sa crime scene.
Nahimong drayber si Bulias sa pamilyang Campo sud na sa 18 ka tuig ug kini nagserbisyo isip drayber sa mga anak ni Gerardo ug duha pa lang ka buwan kang Gerardo. Sigun pa ni Pablo nga si Campo ang nagpamaneho tungod sa iyang kakapoy sa trabaho.
"Adunay posibilidad nga nasayop ang mga suspek ug nagtuo silang si Campo ang nagmaneho sa iyang sakyanan," dugang pa ni Pablo.
Dugang pa ni Pablo gikatahong nagplano si Campo pagpangayo og police security alang sa iyang seguridad. (BANAT NEWS)