CEBU, Philippines - Tulo ang patay ug usa niini polis, ug duha ka polis usab ang angol ug duha ang nasikop human sa engkwentro tali sa kapolisan ug sa grupo sa mga armadong lalaki pasado alas 7 sa miaging gabii sa sitio Buyo, Barangay Binongkalan sa lungsod sa Catmon.
Gideklarar nga dead on arrival si Police Officer 2 Dionesio Jurbina, 54, sakop sa Catmon Police Station, ug gikinahanglan nga operahan sila si SPO2 Rex Menchavez, 54, ug si PO2 Aaron Benjamin Arizo, 35.
Gideklarar sab nga dead on arrival sila si Lito Gumolon, 53, taga Lawaan, Talisay City ug si King Siroy Porgatorio Lusifer, 41, taga Candabong, Argao.
Ang grupo gikatahong mga sakop sa Pistalis Organization nga giingong sakop kaniadto sa usa ka relihiyosong pundok.
Samtang gidakop ang presidente sa Pistalis nga si Andrew Ocasla, 44, mas naila nga “Kuya Manong” ug si Tomas Bracero, 27, taga San Roque, Sogod.
Si Senior Inspector Roberto Hugo, hepe sa Catmon Police Station, nga nahinabi sa Banat News miingon nga si PO3 Ben Navales nakadawat og taho gikan sa concerned citizen nga dunay nasigpatang mga lalaki nga kadudahan og lihok sa Sitio Buyo.
Ang taho nagkanayon nga duha ka oras nga nagpundo ang maong mga lalaki diha sa lugar gikan alas-5 pa sa hapon.
Mirespondi ang tulo ka polis apan si Jurbina gidiretso pagpusil sa ulo sa tawong nagpahipi sa daplin dihang iyang gisitar ang usa diha daplin sa dalan.
Sila si Menchavez ug si Aaron daling nakigpinusilay apan nangaigo usab sila sa abaga.
Mirespondi ang kapolisan sa Sogod, Carmen ug Special Weapons and Tactics sa Danao City Police Station.
Sa pagrespondi sa mga polis nasugatan nila si Ocasla nga nakuhaan og granada samtang si Bracero nakuhaan og shabu.
Nagduda si Hugo nga tulis ang tuyo sa grupo sanglit ang lugar duol lang sa balay sa usa ka negosyante nga nahimong pasyente ni Ocasla sa iyang pagpanambal.
Apan si Ocasla mihimakak nga nakuhaan siya og granada ug didto siya kay mopalit siya og gatas padulong sa Carmen apan gidakop siya sa kapolisan.
Samtang si Bracero miingon nga wala siya kaila ni Ocasla apan gidakop siya kay mikanaog siya sa checkpoint.
Nakuha gikan sa mga dinakpan ang duha ka kalibre .45 nga armas, usa ka granada, mga dagkong habak, kwintas ug singsing ug duha ka putos sa shabu.
Si Ocasla miingon nga magbisitahan siya sa lugar kay ang Catmon lakip sa iyang misyon nga lugar nga tambalan.
Matud pa niya ang duha nga namatay kauban niya sa pagtoo apan wala siya masayod nga ingon ato diay ang ilang binuhatan.
Gikasubo sa direktor sa kapulisan sa Cebu Provincial Police Office, Sr. Supt. Noel Gillamac ang pagkamatay ni Jurbina, 54, ug pagkaangol nilang Menchavez ug Arizo.
Si Mayor Dan Jusay sa Catmon mihimakak sa rep0ort nga sakop sa New People’s Army (NPA) ang mga suspek, matud niya robbery-extortion ang modus sa mga suspetsado base sa impormasyong ilang nakaylap. (Bryner Diaz, Jojo Ugdol, Rowena Capistrano ug Brenda Batuto/EIM)