CEBU, Philippines - Aron wala na’y rason nga duna pa’y himuong mga ilegal nga pagpamutol sa kahoy ug pag-transport niini, gihimo na nga mas dali sa Department of Environment and Natural Resources ang pagkuha og permit pinaagi sa on-line application.
Usa sa nabantayan sa Enforcement Division sa DENR-7 nga kaniadto istrikto sila sa pagpagawas og permit apan hinay sila sa monitoring.
Hinungdan nga nakahuna-huna ang ahensiya aron mominus ang mga ilegalista nga himuong paperless ang transaksiyon alang sa pagkuha og permit.
Apan istriktuhon nila ang pag-monitor niadtong mga mosulod ug gawas nga mga pinutol nga kahoy ilabi na sa pagpamutol kun nisunod gyud sa proseso.
Ang buot mokuha og permit mahimong mosulod sa website sa ahensiya nga www.r7.denr.gov.ph diin sa kilid nga bahin makita ang frontline services.
Gipasabot sa ahensiya nga tanang klase sa kahoy bisan pa man kun anaa kini sa tugkuran o tinanum mismo, magkinahanglan kini og permit
Una, gikinahanglan ang certification gikan sa barangay kun uyon sila nga putlon ang kahoy.
Nasuta nga kun sobra sa 10 ka punoan sa kahoy nga putlon, gikinahanglan ang public hearing sa barangay ug i-establisar nga sa maong yuta naggikan ang punoan sa kahoy sa dili pa makakuha og permit sa DENR.
Samtang lahi usab ang permit alang niadtong ibiyahe ang mga kahoy bisan pa kun sa barangay, munisipalidad ug laing probinsiya dad-on.
Kadtong masakpan nga wala motuman mag-atubang og kasong kriminal ug mahimong mabilanggo sulod sa unom ka tuig.
Niadtong tuig 2013, 20 ka kaso ang napasaka sa DENR diin upat niini ang kombiktado.
Sa 2014 nitaas ang kaso ngadto sa 37 ug walo ang nabasura ug usa ang kombiktado.
Karong tuiga, gikan sa Enero hangtud Oktubre, aduna’y napasaka nga 26 ka kaso. (BANAT NEWS)