CEBU, Philippines – Nailad sa atubangan ug nakuhaan sa kapin P20 mil nga salapi ang duha ka tindera sa usa ka bakeshop ug tindahan sa Malbog Alegria, lungsod sa Samboan pasado alas 8 sa nakalabay nga gabii. Ang mangingilad usa sab ka babaye nga nagpatuo nga maningil sa utang sa agalon sa mga tindera ug tag-iya sa bakeshop ug tindahan.
Matud ni Police Officer 1 Cesar Catubig sa Samboan Police nga nahinabi sa Banat News nga ang nabiktima nga tindahan mao ang Linie Laurel Store nga gipanag-iya ni Linie Piñez nga nagpuyo ra sab sa mao’ng dapit.
Tapad sa tindahan ang usa ka bakeshop nga gipanag-iya ni Piñez diin nagtrabaho ang duha ka babaye nga sila si Elsa Azucenas, 19, sa tindahan ug Janice Rollo, 19, sa bakeshop.
Pasado alas 8 sa gabii sa diha’ng naabot sa mao’ng dapit ang usa ka babaye ug niingon nga maningil kini sa utang sa iya’ng agalon. Nanghulam kini sa cellphone ni Elsa kay kunohay mo-text ug didto kini nakahigayon sa pag-delete sa numero sa iya’ng agalon ug giilisan sa numero sa mangingilad.
Didto na nakahigayon og text sa cellphone ni Elsa nga nagpatuo nga iya’ng agalon nga nag-ingon nga ihatag na lang ang ila’ng kinitaan bayad sa iya’ng utang sa ligid ug sa utang sa load.
Nadala gyud sa kawatan ang P24, 000 diin human niya nakuha paspas pa sa kilat nga nakasakay og habal-habal dayon sibat.
Ulahi na nakamatikod ang duha ka tindera nga sila nailad human nahibalo ang ila’ng agalon. “Pwerte’ng ilara intawon kay ang ingon ni Elsa nga nag-text man daw niya si ma’am nga gipahatag na lang ang ila’ng kinitaan bayad sa utang, unya ang nag text-text ang mangingilad diay. Giilad intawon sa atubangan,” matud ni Catubig.
Ang drayber sa habal-habal nga gisakyan sa mangingilad niingon nga nagpahatud kaniya ang babaye sa barangay San Sebastian ug nisakay na sab og laing habal-habal nga nagpahatud sa lungsod sa Santander.
Nagduda si Catubig nga dugay na nga naniid sa tindahan ang mangingilad kay maayo man kini nga nakabolatik sa duha ka tindera. “Paminaw nako sir dugay na ni nga naniid, unya makaila gyud siya sa tag-iya sa tindahan kay ang pangalan sa tindahan mao ma’y ngalan sa ila’ng agalon,” sumala pa ni Catubig.
Wala’y close circuit television (CCTV) camera ang tindahan ug bakeshop nga daku unta og matabang sa pag-ila sa mangingilad. – /GMR) (BANAT NEWS)