CEBU, Philippines – Mga drayber nga wala magpakabana pagbayad sa ilang multa tungod sa kalapasan sa mga lagda sa trapiko nalutsan og warrants of arrest sa korte.
Adunay 18 ka mga warrant of arrest batok sa malapason nga mga driver ang giisyu sa Municipal Trial Court in Cities MTCC Branch 1 Presiding Judge Monalila Tecson sa bulan sa Oktubre.
Sila kadtong mga nalapas ang City Ordinance 801 “An Ordinance establishing a traffic code for the City of Cebu.”
Matud pa ni Atty. Rey Gealon, ang pangulo sa Cebu City Transportation Office, kinahanglan atimanon sa mga drayber ang matag violations nga ilang giatubang aron dili na moabot sa punto nga maisyuhan pa sila og warrant of arrest.
Giawhag ni Gealon ang mga drayber aron dili sila mahasol sa ilang pagpamasahero ug motambong pa sila sa ilang hearing sa korte mas maayo nga bayran nila dayon ang multa sa mga traffic violations nga ilang nahimo diha sa buhatan sa CCTO.
Sumala pa ni Gealon para makalikay sa problema ang mga driver mas maayo gayud nga mosunod sila unsay nalatid sa balaod trapiko para malampuson ang ilang pagmaneho. – /EIM) (BANAT NEWS)