CEBU, Philippines – Usa ka Japanese national ang gidakop sa mga polis human nasakpan sa security screening officer nga nagdala kini og ginadiling drugas samtang padung mobiyahe agi sa Mactan-Cebu International Airport sa dakbayan sa Lapu-Lapu kagahapon sa buntag.
Matud ni Police Chief Inspector Gazbamiler Guzman, deputy chief sa Aviation Security Unit sa MCIA, padulong mopauli sa Osaka, Japan si Shinji Mori, 37.
Apan nakit-an sa x-ray machine sa tugpahanan ang usa ka gituohang “tooter” sulod sa bulsa niini maong ila kining gipangutana apan wala kini motubag sa security screening officer nga si Mary Grace Navarro.
Tungod kay daw wala mahimutang ang langyaw gipugngan nila si Mori ug gipahigayon ang pag-check sa bag niini ug didto nakit-an ang usa ka paketeng gidudahang shabu. Dihang subli kining gipangutana ni Navarro miangkon kini nga iya ang maong drugas.
Base sa inisyal nga imbestigasyon, miabot dinhi sa siyudad si Mori sa miaging Oktubre 29 aron magbakasyon og alas 9 ang iyahang schedule flight sakay sa Philippine Air Lines pabalik sa ilang nasud.
Si Mori gitanggong karon sa Lapu-Lapu City Police Office- Holding Cell ug pasakaan og kasong paglapas sa Republic Act 9165 o Comprehensive Dangerous Drugs Act of 2002 karong adlawa. – /EIM) (BANAT NEWS)