2 Romanian “bank account hackers” nadakpan

CEBU, Philippines – Lain na usab nga mga langyaw nga gidudahang sakop sa usa ka dakong sindikato sa mga bank hackers didto sa Uropa ang nadakpan sa mga sakop sa Criminal Investigation and Detection Group (CIDG-7).

Ang mga nadakpan mao ang duha ka mga Romanians nga sila si Petru Ion Uyeges, 43, taga Angeles City, Pampanga ug Stefanie Michaela Osman, 36.

Ang duha nisuway unta pag-withdraw og kwarta diha sa usa ka bangko sa barangay Tipolo dakbayan sa Mandanue niadtong nakalabay nga gabii.

Gawas sa CIDG-7, lakip sa mitabang pagsikop sa duha ang City Intelligence Branch (CIB) sa Cebu City Police Office.

Si Superintendent Marlon Tayaba, officer-in-charge sa CIDG-7 nagkanayon nga  dugay na nilang gipanid-an ang kalihokan sa duha human sila nakadawat og reklamo batok kanila sa usa ka tagdumala sa bangko.

Matud pa natahap ang bangko sa ilang mga lihok ilabi na nga dagko kaayo ang mga kantidad sa salapi nga ilang i-withdraw kada adlaw nga usahay mokabat og tunga sa milyon ka pesos.

Atol sa maong hitabo tayming nga naaktohan sa kapulisan nga nag- withdraw sa automatic teller machine ang duha gamit ang peke nga ATM card nga gikan sa British Export cards.

Gawas sa duha naa pa’y laing duha ka kauban ang duha apan kini nakasibat.

Aduna pay laing mga langyaw nga gipanid-an ang kapolisan nga gidudahan gihapong kauban sa duha.

Sa nakalabay nga buwan, usa ka Romanian gihapon ang nadakpan kinsa migamit og reward cards nga gi-clone gikan sa usa ka bank account didto sa Uropa nga ilang na-hack, apan nadakpan kini sa usa ka gwardiya ug gi-turnover sa CIB.

Si Tayaba nagkanayon nga human nadakpan sa taga CIB ang unang Romanian national mihimo imbestigasyon ang CIDG-7 sa kalihokan sa uban pang mga Romanians nga ania sa Sugbo hangtud nga ilang nasugatan ang kabahin sa duha.

Narekober sa kapulisan gikan sa duha ang 67 ka mga British Export Card, duha ka pitaka ug duha ka selpon.  Samtang gikan kang Stefanie Michaela ang salaping cash nga P52,000 ug usa ka Toyota Innova nga maoy ilang gigamit.

Sama sa naunang hitabo wala’y Pilipino nga nabiktima ang duha tungod kay ang ilang gipang-hack nga bank accounts didto man sa Uropa, apan mapasakaan gihapon sila og kasong paglapas sa Republic Act 8484 o Access Device Regulation Act of 1998.

Ang mga suspek nagdumili paghatag og pamahayag bahin sa mga alegasyon kanila dihang gisuwayan pagkuha sa ilang habig sa mga sakop sa media. – /EIM) (BANAT NEWS)