Manghod gipusil sa maguwang

CEBU, Philippines - Kritikal ang kahimtang sa usa ka 21-anyos nga biktima sa pagpamusil sa iyang maguwang didto sa Barangay Nangka, dakbayan sa Danao kaniadtong Huwebes sa buntag.

Si PO1 Fernando Gonzalez sa Danao City Police Station miila sa biktima nga si Rolly Labador, 21 anyos nga gipusil sa iyang maguwang nga si Bernardo Labador, 26, nga parehong taga Barangay Nangka.

Matud ni PO1 Gonzalez nga nagkalalis ang maguwang ug manghod kabahin sa suliran sa ilang pamilya. Ang maguwang nga wala na makapugong sa iyang kapungot nga gitubagtubag sa iyang manghod dali nga mikuha’g armas ug gipusil ang biktima.

Ang biktima nakaangkon og pinusilan sa tiyan ug sa bukton. Ang suspek dali nga nisibat pahilayo sa maong dapit ug ang biktima gidala sa Don Severo Dosado Memorial Hospital sa Barangay Damulog, Sogod apan gibalhin ra usab sa Vicente Sotto Memorial Medical Center dinhi sa dakbayan sa Sugbo. (Romeo T. Limpangog/RUB)(BANAT NEWS)