CEBU, Philippines – Nadakpan sa kapolisan ang suspek sa pagpanguha og mahalong gadgets sulod sa mga tambalanan human kini nasakpan sa ulahi’ng biktima sa Vicente Sotto Memorial Medical Center pasado alas 5 niadto’ng nakalabay nga hapon.
Giila ang suspek nga si Joseph Rosario, 36, minyo nga taga Mantuyong, dakbayan sa Mandaue.
Modus sa suspek ang pagsulod sa mga tambalanan ug magpatuo nga adunay gibantayan nga pasyente apan mangita lang og sakto’ng tayming nga makakuha sa mga mahalong gadgets kung malipat ang mga tag-iya.
Matud ni Senior Insp. Rolito Sopatan, hepe sa Theft and Robbery Section (TRS) sa Cebu City Police Office, nga ulahi’ng nabiktima ni Rosario mao si Chymbee Sherman nga nakuhaan og usa ka cellphone.
Gikan sa pansayan ang biktima ug sa iya’ng paggawas iya’ng nakita nga gikuha sa suspek ang cellphone nga dali nga nigawas sa tambalanan.
Dali sab nga gigukod sa biktima ug nagpakitabang sa mga istambay sa lugar.
Tayming nga adunay mga polis nga nagpatrolya sa gawas sa tambalanan hinungdan nga napusasan ang suspek.
Si Rosario nga nahinabi sa mga tigbalita dali sab nga niangkon sa pasangil ug nitug-an nga nakabiktima na sab siya sa lain pa nga pribado’ng tambalanan.
Iya lang daw nahimo ang pagpangawat kay nagsakit ang iya’ng iyaan ug gusto siya nga makatabang. – /GMR) (BANAT NEWS)