15 container vans nahanaw, 4 nakit-an
CEBU, Philippines – Napalgan na sa taga Bureau of Customs ang upat sa 15 ka container vans nga nahanaw sulod sa usa ka warehouse sa dakbayan sa Sugbo.
Gisusi ni Cebu Customs District Collector, retired Gen. Arnulfo Marcos, ang bodega sa JV Tire Supply and Magwheels M.J. Cuenco Avenue eskina Tres Borces Padres sa Mabolo ug sa usa ka construction warehouse sa S. O Albano Street.
Matud ni Atty. Kenneth Kern Sesante, chief of staff sa buhatan sa District Collector, nga napagawas ang 15 ka container vans nga wala nakabayad sa mga bayranan hinungdan sa pagkasuspenso sa wharfinger nga si Flordicante Platil samtang ipahigayon pa ang imbestigasyon.
Ang upat ka container vans kargado og mga kontrabando nga ligid samtang pito ang toa sa Iloilo nga adunay sulod construction materials ug ang laing upat nga dunay sulod nga general merchandise giingong naa usab sa lainlaing lugar.
Gibutyag ni Sesante nga gipangayo nila sa tag-iya sa warehouse ang mga dokumento nga sila nakabayad apan giingong wala mokooperar ang tag-iya hinungdan nga ila’ng giselyuhan ang warehouse.
Gibana-bana nga moabot sa P8 milyones ang kantidad sa kargamento sa 15 ka container vans nga wala’y gibayad bisan usa ka sentimo ngadto sa gobiyerno. Gisusi karon sa BOC ang mga tawo nga nalambigit sa pagkahanaw sa 15 ka container vans.
Ang pagkahanaw mao’y ikaduha nga insidente sukad sa una’ng pagkawala sa pipila ka container vans niadto’ng tuig 2007. – /GMR) (BANAT NEWS)
- Latest
