Pier 3 vendors nakakuha’g TRO

CEBU, Philippines – Gipugngan sa korte ang gikatakda unta nga pagdemolis sa 22 ka tindahan sa Pier 3 daplin sa dalan Arellano ug V. Sotto sa Tinago, dakbayan sa Sugbo.

Ang Port Area Street Traders Association (PASTA) nakakuha og temporary restraining order batok sa Prevention Restoration Order Beautification Enhancement (PROBE) Team.

Sayo niini naalarma ang mga manindahay nga aduna’y heavy equipment nga gipahimutang alang sa pagguba sa ila’ng mga tindahan hinungdan nga dali sila’ng nidangop sa korte. Ang nisang-at og petisyon mao sila si Jed Jumawan, Carmer Toting, Liezl Mancisco, Marites Caindoy, Maria Sylvana Celis, Alvin Sajo, Jimmy Amerol, Edwin Occiano Sr., Adolfo Ornobia, Loreto Roca ug Jeanette Capuyan.

Ang mga manindahay nahimutang kanhi sa may atubangan sa Pier 3 apan gipapahawa nunot sa pagbutang sa Metro Ferry ticketing office sukad niadto’ng 2009.

Gibalhin sila sa kasamtangang lugar pinasikad sa kasabutan tali sa Cebu Port Authority ug barangay Tinago ug may pagtugot ni kanhi mayor Tomas Osmeña.

Giingong butangan sa kagamhanan sa dakbayan sa Sugbo og pathways ang lugar hinungdan nga pahawanan sa mga manindahay.

Si Judge Soliver Peras niluwat og 72-oras nga TRO samtang sulbaron pa ang isyu. – /GMR) (BANAT NEWS)