Mga sam-ang butangan og CCTV

CEBU, Philippines – Butangan og close-circuit television (CCTV) cameras ang upat ka dagku’ng sam-ang sa dakbayan sa Sugbo atol sa pagsaulog sa adlaw sa mga Santos ug Kalag.

Gibutyag ni Konsehal Dave Tumulak, pangulo sa Cebu City Disaster Risk Reduction Management Office, nga ang butangan og CCTV camera mao ang mga sam-ang sa Pardo, Calamba, Queen City ug Carreta.

Matud ni Tumulak nga preparado na sila karon alang sa Oplan Kalag-kalag diin nakig-alayon na sila sa mga hingtungdan nga ahensya alang sa pagpatuman sa kahapsay ug kalinaw.

Petsa 28 mosugod na sila pagpakatap og mga tawo sa mga sam-ang tungod kay ila’ng napanglantawan nga modagsa ang mga tawo sa adlaw sa Biyernes, Sabado ug Domingo aron moduaw sa mga lubong.

Gibutyag ni Tumulak nga andam na usab ang mga ambulansiya, firetruck, peacekeeper ug lakip sa mga sakop sa Prevention Restoration Orderly Beautification Enhancement (PROBE) Team nga nagpadayon sa ila’ng clearing operation sa pipila ka sam-ang.

Nakig-alayon usab sila sa mga parokya nga adunay mga sam-ang aron magpabilin ang kahapsay ug kalinaw sa solemne nga kalihukan.

Giawhag ni Tumulak ang katawhan nga dili maghurot pagbiya sa panimalay bisan og red alert ang kapolisan aron dili mabiktima sa mga badlongon sa katilingban o kaha sa pagpahibalo sa ila’ng mga silingan sa pagtan-aw-tan-aw usab sa ila’ng balay.

Samtang nikusog na ang palit sa mga buwak sa Freedom Park ug Carbon nunot sa nagkaduol na nga Kalag-kalag.

Gawas sa kandila, usa usab ang buwak nga labi’ng halinon niini’ng panahona isip halad ngadto sa mga minahal sa kinabuhi nga nitaliwan na sa laing kalibutan.

Matud nila’ng Cristina Gabunada ug Flora Alvarez, kapin sa 20 ka tuig na nga naninda og buwak sa mao’ng lugar, nga daghan na sa ilang mga suki ang nidagsa sa ila’ng pwesto aron mopalit og buwak.

Ang Chrysanthemum mapalit sa P100 ang dosena, Aster nga tag P50 ang dosena, Borlas sa tag P60 ang dosena, Roses P50 ang dosena, Malaysian mums tag P50 ang dosena ug Gradiola tag P300 ang basket ug Anthurium mapalit sa P100 ang dosena.

Lauman nga mosaka pa ang presyo atol na sa adlaw sa Kalag-kalag.

Ang rason mao ang pagsaka sa presyo sa buwak nga ila’ng i-angkat sa bukirang barangay.

Panghinaut sa mga manindahay og buwak sa Freedom Park nga unta mokusog ang ila’ng halin karong tuiga tungod kay minus ang ila’ng halin sa niagi’ng tuig. – /GMR) (BANAT NEWS)