CEBU, Philippines – Tagdumala og balay-patigayon nga nagbase sa Sitio Nasipit, Talamban giandaman na og kaso sa City Legal Office tungod kay ang iyang luna alang sa parking area sa mga sakyanan gigamit niya nga commercial space.
Si Architect Florante Catalan nga maoy assistant chief sa Office of the Building Officials (OBO) sa dakbayan sa Sugbo, mirekomendar ngadto sa City Legal Office aron himoan og lakang legal si Henry Yu nga maoy tagdumala sa Cebu Dragon Management & Development Corporation. Matud ni Catalan nga ang gihimo sa tagdumala sa mao nga balay-patigayon usa ka kalapasan sa lagda nga gilatid sa National Building Code of the Philippines.
Nakabantay ang mga tinugyanan sa City Hall nga daghang tagdumala og balay-patigayon nga magbutang lang og parking area sa mga sakyanan panahon nga molukat pa sila og permit, apan gamiton nila dayon sa commercial kun kaisyohan na sila og permit. (BANAT NEWS)