Maestra naangol kay gidaro sa multicab
CEBU, Philippines – Nakaangkon og mga samad sa kalawasan ang usa ka magtutudlo ug laing kauban niini human nga sila gidasmagan sa naghaguros nga multicab van didto sa Sityo Sambag, Barangay Sangi, Toledo niadto’ng Domingo.
Ang mga biktima mao sila si Melchi Araneta, 31, taga Barangay Luray Dos, usa ka magtutudlo sa Alternative Learning System (ALS) ug usa ka Claire Ann Tomarong, 20 anyos.
Base sa imbestigasyon sa Toledo City traffic section nga luwan ang mga biktima sa motorsiklo nga gimaneho ni Araneta gikan sa Barangay Poblacion ug paingon unta sila sa Sangi.
Pag-abot nila sa nahisgutang lugar, mi-signal si Araneta nga moliko sila sa wala apan gidasmagan sila sa naghaguros nga multicab hinungdan sa ilang paghilukapa.
Naabtan pa ni PO2 Romeo Jaranilla ug kaubanan ang angkas ni Araneta nga si Tomarong nga nagbuy-od sa karsada ug nagkadugo ang ulo, samtang si Araneta nakaangkon og mga bun-og ug pangos.
Ang drayber sa multicab mibiya lang sa mga biktima apan adunay nakatug-an sa kapolisan sa plate number sa mao nga sakyanan. – /RUB) (BANAT NEWS)
- Latest
