CEBU, Philippines – Gikatakdang mopadala og suwat ang pito ka mga transport groups dinhi sa Sugbo ngadto sa tanang kongresista sa lalawigan, partylist representatives, mga mayor ug traffic heads in Metro Cebu, aron awhagon silang patun-an pa og maayo ang planong pagbutang og My Bus dinhi sa Metro Cebu.
Buot nilang manginlabot ang maong mga opisyal sa gitinguha karon sa Department of Transportation and Communications (DOTC) ug Land Transportation Franchising and Regulatory Board sa aplikasyon sa SM Holdings Inc. ug Jam Transport nga planong mo-operate og 77 ka mga bus dinhi.
Ang maong transport groups gilangkoban sa Cebu Integrated Transport Service Multi-Purpose Cooperative, the Visayan United Transport Service Multi-Purpose Cooperative, the Cebu Provincial Bus Operators Association, the Cebu South Mini Bus Operators Association, the National Confederation of Transport Union-Visayas, the Pinagkaisahang Samahan ng mga Tsuper at Operators Nationwide-Cebu Gusto sa ilang grupo nga tan-awon og maayo ang tanang anggulo sa planong pagbutang sa Metro Rapid Transit System Inc. nga joint venture sa SM Holdings Inc. ug Jam Transport.
Samtang si Romeo Armamento, NCTU-Visayas president, miklaro nga di sila supak sa pagbutang niini ug ang pagpalambo sa transportasyon, ang gusto nila nga dili sila makulban og kaldero sa pagsugod niini. "Di mi gusto nga lipat-lipaton lang mi. Mao ng magpatabang mi sa atong mga kongresista," matud pang Armamento.
Niadtong Oktubre 16 gihimo ang public hearing alang sa aplikasyon sa prangkisa sa MRTSI ug nagtuo ang ilang abogado nga si Jomar Castillo nga maaprubahan gyud ilang aplikasyon nga giendorsar mismo sa upat ka mga local government units sa Metro Cebu nga gilangkoban sa Talisay, Cebu, Mandaue ug Lapu-Lapu.
Ang mga nagreklamong transport groups miingon nga nagdugangdugang lang kini sa problema sa trapiko sa Metro Cebu. (Gikan sa The Freeman/EIM)