CEBU, Philippines - Wala mahinayon ang pag-demolish sa mga panimalay sa sitio Panaghiusa, North Reclamation Area, barangay Carreta sa dakbayan sa Sugbo kagahapon.
Kini human si Cebu City Vice Mayor Edgardo Labella ug ang Kapitan sa barangay nga si Eduardo Lauron mihangyo sa kadagkuan sa Landtraders World Properties Corp. nga maoy nakapalit sa luna nga gitukuran sa mga panimalay nga ioktaba una ang demolisyon.
Kagahapon sa buntag, nagtapok na ang demolition team, nagpaabot sa abiso sa sheriff nga maoy nagdala sa court order aron ipahigayon ang demolisyon sa dili mominus 30 ka panimalay sa nahisgutang lugar.
Miabot sa lugar sila si Labella ug Lauron, ug ilang giadto ang kadagkuan sa Landtraders World Properties Corp. nga girepresentahan ni Jose Roberto Nuñez. Human sa dul-an upat ka oras nga negosasyon nitugot ang kompanya nga di ihinayon ang demolisyon.
Ang mga residente mihangyo nga hatagan sila og lugway nga unom ka buwan.
Apan gipasabot sa bise mayor nga kinahanglan mosunod kun unsay anaa sa balaod ilabi na ang desisyon sa korte labot sa demolisyon nga final and executory na. Bisan tuod og wala tuguti ang unom ka buwan nga lugway apan nahatagan sila kutob Nobiyembre 30 aron boluntaryong moguba sa ilang mga panimalay.
Nasabutan usab nga ang residente nga dili mopirma gub-on ang panimalay.
Plano ni Labella mahatagan og hinabang pinansyal nga P10 mil ang matag panimalay. (Decemay P. Padilla/EIM)(BANAT NEWS)