Way kasong mapasaka

CEBU, Philippines - Bisan usa ka kaso way mapasaka ang kapolisan sa Sugbo batok sa magtiayong Chinese nga niangol sa ilang Consul General ug mipatay sa duha ka staff niini sud sa usa ka kan-anan.

Bisan ang paghupot nila og armas nga paltik nga walay mga dokumento dili makapasaka og kaso ang kapolisan tungod sa ilang “diplomatic immunity” sumala pa sa mga kadagkoan sa Police Regional Office-7.

Ang magtiayong Li Quing Liang, 60 ug asawa niining si Gou Jing, 57, gibalhin na og kostudiya diha sa PRO-7 usa ka adlaw human sila nakatulog sa Cebu City Police Office headquarters.

Ang mga suspek mao ang gitumbok nga mipatay kanila ni Chinese deputy consul Sun Shan ug finance officer Hui Li ug miangol kang Chinese Consul General Song Ronghua.

Nasuta nga ang narekober nga .45 kalibre pistola nga gikatahong maoy gigamit sa bana sa pagpamusil ug pagkahuman gihipos usab sa iyang asawa dili rehistradong armas.

Matud pa ni Chief Superintendent Prudencio Tom Bañas, regional director sa PRO-7, adunay kaparehas nga serial number sa laing armas nga gipanag-iya og laing tawo ang maong paltik.

“So the firearm that was used in the commission of the crime ay kinopya lang or siguro nagkataon lang na kapareho ng firearm na talagang lisensyado,” pasabot pa ni Bañas.

Matud pa niya, nakaestorya na sa kapolisan ang tag-iya sa armas nga adunay kaparehas nga serial number niini nga taga Valenzuela City.

Ang armas gibaligya na ngadto sa laing tawo apan na-recover na kini sa mga polis ug gipresentar ngadto sa Camp Crame.

“The original firearm is with the Firearms and Explosives Office in the Camp Crame while the one in here (used by Liang) is at the crime laboratory,”matud pa ni Bañas.

Sumala pa ni Bañas kun dili pa sa ilang ‘diplomatic immunity’ makasohan ang duha og illegal possession of firearms.

“So they are covered by that, they have invoked the diplomatic immunity by these consular officers. And the government of the Philippines recognize them,” matud niya.

Sumala pa nga niabot na ang Chinese ambassador dinhi sa Sugbo kagahapon kauban ang 25 ka mga Chinese police, apan wala ibutyag kun unsay ilang tuyo dinhi.

Wala hinuon mokompirmar ug wa usab mohimakak bahin niini si Bañas apan dunay report kagabii nga  gidala na ngadto sa Manila ang mga suspek aron dad-on balik sa China.

Usa ka Japanese reporter nga gipadala dinhi sa Cebu aron pagkuha sa estorya miingon nga talagsaon kaayo ang maong kaso.

Si Kensaku Amamu, 41, sa Sankei Shimbun Newspaper Company miingon nga nahingangha siya sa paggamit sa mga suspek sa ilang ‘diplomatic immunity’ bisan nakahimo sila og linoog nga krimen.

Matud niya, dili kini mahimo didto sa Japan.

“I have never heard this case before in Japan. But I think if similar case will happen in Japan, Japan may punish them. There will be no immunity,” matud pang Amamu kinsa 18 ka tuig nang nagtrabaho sa maong pamantalaan. (Gikan sa The Freeman/EIM)(BANAT NEWS)